Jólagjafir meira og minna búnar

Þá er búið að versla flestar jólagjafir fyrir börnin, Fannar bróðir fær bílabraut sem að hann hefur alltaf óskað sér eða síðan hann skammaði mig fyrir að gefa sér svoleiðis út af því að hann var svo gamall þegar hann var 11 eða 12 ára. Mikið var gaman að klára svona margt af þessu í dag og þurfa ekki að hafa áhyggjur af þessu meira fyrr en eftir ár eða svo.  Núna getur maður notið desember mikið betur og nýtt tímann til þess að setja sig betur inn í vinnuna. Hlakka til þegar þetta loks gengur í garð, tveir dagar í nýju vinnuna en hafði samt vit á því að fara fyrst á fimmtudaginn því að fimmtudagur er til frægðar en mánudagur til moldar, borgar sig ekki að storka örlögunum, alveg farinn að átta mig á því.  Kem til með að vinna í lottóinu í kvöld og fagna því með stórri gjöf handa konunni, hún á það alveg skilið þó að hún sé eins og hún er.  LOL.

Stendur hérna yfir mér og gerir grín að þessu.  Hún er samt algjör elska búin að ganga í gegnum helvíti nú þegar og erum við samt bara nýgift eða fyrir einu og hálfu ári síðan, hún veit þó alla veganna hvað er eftir héðan í frá, VANDAMÁL.

Langaði bara að skrifa aðeins í dag, er að fara í laufabrauð núna ásamt Oliver syni mínum en konan og dóttirin verða heima þar sem að dóttirin er veik og konan þarf að þrífa áður en að hún fer norður á Akureyri í þrjá daga á morgun.

Bleee

Jólin eru að koma

Þá er farið að líða að jólum.  Ég og konan fórum í Bónus í dag og keyptum fullt af gosi þar sem að það var á tilboði, keyptum einnig fyrir foreldra mína og tengdó appelsínkippur og voru þau himinlifandi enda kostaði kippan ekki nema 588 krónur af tveggja lítra. Var gaman að koma með þetta til þeirra þar sem að þau bjuggust alls ekki við þessu og gaman var að sjá svipinn á þeim þegar við komum með þetta.  Mér leið inn í mér eins og litlu barni um jólin, hitnaði inn í mér og leið mjög vel, langt síðan ég hef fengið þessa tilfinningu, einnig gerir snjórinn það að verkum að það er eins og jól.  Alltaf gaman að geta gert hluti fyrir aðra og látið manni sjálfum líða vel í leiðinni.  Höfum því miður ekki haft mikið af tækifærum til þess seinasta ár þar sem að þetta var erfiðasta ár sem að ég hef lifað og óska ekki einu sinni mínum versta óvini þess að hann upplifi þetta ár eins og ég.  En eins og frægur maður sagði, það sem drepur mann ekki, styrkir mann og hef ég haft þetta að leiðarljósi í lengri tíma en ég sjálfur vissi og tók ekki eftir því fyrr en að ég eins og Bubbi vinur minn sagði mætti djöflinum og tók í höndina á honum og hann sá að það var ekki pláss fyrir mig þar neðra og sendi mig upp aftur til að halda áfram, hve mikið ég hef haft þetta að leiðarljósi í lífinu.

Ég ætla að koma sterkari til leiks núna en ég hef nokkurn tíma  verið og sýna mig og sanna í nýju vinnunni þegar hún byrjar og gera þetta að besta hóteli landsins með tíð og tíma, þannig sýni ég kunnáttu mína á þessu sem að ég lærði og get orðið að einum besta hótelstjóra fyrr og síðar sem um getur í sögunni.  Þá fyrst verður ritað um mig bækur og kannski gert kvikmyndir um líf mitt, sérstaklega þar sem ég hef lifað áhugaverðara lífi en t.d. Wayne Rooney sem að aðeins 21s árs hefur gert bókasamning um líf sitt og þarf að fara að gera eitthvað áhugaverðara en að æfa fótbolta og riðlast á gömlum hórum til að geta gefið frá sér áhugaverða bók um líf sitt til þessa, gaman væri ef að hann myndi lenda í einhverjum "alvöru" vandamálum eins og venjulegt fólk lendir í, t.d. fjárhagsvandræðum, heilsufarsvandamálum og svo framvegis.  Alla veganna ætla ég ekki að vera að öfundast meira út í hann því að hann er besti fótboltamaður heims um þessar mundir og á bara eftir að verða betri með besta þjálfara í heimi og í besta félagsliði heims.  En það gerir þetta samt bara heimskt. 

Vildi óska þess að ég væri að fara á Rockstar tónleikana en það verður að bíða betri tíma að sinni.

 

Kveðja 

29 Ára í sjötta skiptið

Þá er að líða að þessu, að ég verði 29 ára í sjötta skiptið, ég held að ég fari yfir twenty something á næsta ári og verði loksins thirty something, enda kominn tími til segja sumir, sérstaklega þar sem að ég er fæddur 8. nóvemer árið 1972.  Það besta við þetta er hvað ég lít fáranlega vel út, reyndar aðeins kominn úr æfingu núna eftir mjög svo erfitt ár en ég næ þessu auka sem að hefur sest á magann á mér um leið og ég byrja að vinna, það eru svo miklar göngur í þessu að þetta á eftir að renna af mér eins og smjör og verð ég þá aftur kominn með maga eins og tvítugur drengur.

Ég hef ekki drukkið í rétt yfir eitt ár núna og hef svolítið verið að spá í því, hvað er svona spennandi við að vera alltaf fullur og að gera sig að fífli, ég tek það fram að ég fór ekki í meðferð heldur hætti bara og mér líður bara mjög vel með það og finn ekki fyrir löngun til að detta í það, fann reyndar mikla löngun til að fara út um seinustu helgi og fór en það var alveg ömurlegt og var ég kominn heim um tvö eftir að hafa keyrt á milli staða.  Held að það verði alla veganna hátt í ár áður en að mig langar að kíkja svona út aftur þannig að þetta var gott að sjá hverju maður var að missa af, nákvæmlega engu.

Mig er farið að hlakka óstjórnlega til 20. nóvember þegar ég byrja að vinna aftur í hótelbransanum og það hérna heima á Íslandi í fyrsta skiptið á minni ævi.  Held að ég geti brillerað með mína reynslu ef að ég geri þetta rétt og vandlega, það er nefnilega mjög auðvelt að klúðra ef að maður ætlar að spila sig einhvern snilling, sem að ég náttúrulega er, en það þarf að læra á hótelið fyrst og svo skoða hvað er hægt að bæta og vinna hægt og bítandi.

Alltaf gaman að eiga afmæli og pæla í hlutum.

 

Kveðja,

Bjarni

Verð heima

Þá er niðurstaða kominn í mín mál, ég hef tekið við starfi hjá Hótel Grand og verð yfirmaður veitinga sem að er þokkaleg staða, alla veganna er ég kominn inn í bransann hérna heima.  Sorrý Pollý en þá get ég ekki ráðið þig úti í Californiu þar sem að ég fer ekki að svo stöddu.  Er mjög sáttur við þessa ákvörðun og get alltaf seinna farið út ef að hugur leitar þangað seinna meir, held reyndar að konan hafi verið orðin meira fyrir að taka sénsinn og fara út núna.  Enda þá bara ferilinn úti í staðinn fyrir að enda hann hérna heima.  Tel að það sé fullt að opnast fyrir mann með mína reynslu hérna heima enda hef ég unnið fyrir 2 af 100 bestu hótelum í heimi og eitt af þeim var á topp 10 samkvæmt virtustu hótelblöðum heimsins.  Það er gaman að sjá að litla Ísland er að taka upp bestu siði frá bæði Ameríku og Evrópu, ekki bara annarri heimsálfunni.  Því miður fyrir okkur eru mikið betri aðbúnaður fyrir hótel í USA frekar en hér í Evrópu kannski vegna þess að mestu leyti fara of miklir skattar í að reka hótelin og þar af leiðandi hægt að borga meira og fá hæfiríkara fólk til starfa enda voru mjög margir af stjórnendum, ekki bara hótelstjórnendum heldur einnig fyrir herbergisþjónustu og veitingastaði og almennt yfirmenn, frá Evrópu. 

Kaupa Danmörk og láta leggja það niður

Hvað er í gangi með þessa Dani núna, það er svo mikil öfundssýki við okkur Íslendinga að þeir kosta til milljörðum til að finna eitthvað smátt að hjá okkur og það nýjasta er að við erum allir meira og minna tengdir við einhverja fjárglæframenn víðs vegar um heiminn.  Nú er nóg komið, nú verslum við ekki meira við dani eða þeirra vörur þeir geta bara átt sig og þetta flata litla land sem að þeir búa á. Þetta með litla d í danir er sett af ásettu ráði þeir eiga ekki skilið stóran staf lengur, ég legg til að peningamenn landsins taki sig saman og kaupi upp allt sem að hægt er í danmörku og leggi landið niður þeir eiga ekki lengur skilið að vera í sama heimi og við.  Þetta er að mínu mati stríðsyfirlýsing og núna er þörf fyrir leyniþjónustu á Íslandi til að yfirtaka danmörku og þeirra smáu hugsun, byrjum að kaupa tívoliið og lokum því hið snarasta þetta á ekki að láta ganga yfir sig og legg ég til að ríkisstjórn Íslands fari í hótanir við dani þar sem að þeir lúffa alltaf, svo að dæmi séu tekinn þá koma upp í hugann teiknimyndir sem að varð þess valdandi að allir danir fóru í felur svo mánuðum skipti.  Ég get ekki orða bundist yfir þessu, þetta minnir um margt á Baugsmálið þar sem að "stóri bróðir" fór hamförum og kom síðan með skottið á milli lappanna  og vildi meiri fjármagn.  Nota þetta auka fjármagn til að greiða einhverjum stríðsmönnum til að leggja danmörku í rúst.  ALDREI og ég meina ALDREI ætla ég að kaupa danskar vörur héðan í frá þeir geta troðið því þar sem sólin skín ekki og helst þversum. 

Ákvarðanir

Þá er komið að einni stórri ákvörðun í viðbót við þetta stutta líf sem að við höfum.

Ég þarf að ákveða hvort að ég taki atvinnutilboði frá Kaliforníu eða bíði og vonist til að ég fái gott tilboð frá hóteli hérna heima sem að ég á í viðræðum við núna.

Ef að ég tek tilboðinu frá Kaliforníu þá þarf öll fjölskyldan að flytjast en ég myndi fara strax, og fjölskyldan kæmi ekki fyrr en í júní vegna skóla hjá öllum nema mér.  Það er stórt mál að fara þarna því að þetta er í 2500 metra hæð yfir sjávarmáli sem að þýðir að maður þyrfti að venjast loftinu þar sem að er mikið þynnra, þetta er skíðasvæði og það er um 3ja tíma akstur til strandarinnar, sama og ef að maður færi með börnin til Disneyland þá er það um þriggja tíma akstur frá svæðinu.  Hitt er hérna heima en það er ekkert ákveðið og þeir gætu skellt launamiða á um 200 þús. sem að er ekki nóg fyrir það sem að ég kann, atvinnutilboðið frá Kalí er 55000$ á ári sem er tæpar 4 milljónir miðað við núverandi gengi að auki yrðu bónusar og að auki þá er rætt um að ég fengi 30 daga viðveru og þá yrði rætt aftur um launin, þeir eru mjög ákafir í því að fá mig út og vilja að ég verði kominn eftir 7-10 daga, þetta hljómar eins og gott tækifæri en það er ekki allt gull sem glóir. Kostir eru yfir 300 sólardagar á ári þokkaleg laun með möguleikum á hærri launum með góðri frammistöðu, kostir fyrir börnin, læra aðra menningu( eins og hérna bara meira amerískt), læra tungumálið snemma, læra að aðlagast breyttum aðstæðum.  Ókostir eru langt frá fjölskyldu og eins og er get ég ekki séð mikið af öðrum ókostum.

Ef ég bíð eftir hinu hótelinu sem að er hérna heima þá gæti ekkert komið út úr því, gætu boðið laun sem að eru ekki sambærileg, kostir eru nálægð við fjölskyldu.

Allir sem að lesa þetta eru vinsamlegast beðnir um að kommenta og láta vita hvað þeir myndu gera í minni stöðu og það sem fyrst þar sem að ég þarf að ákveða mig helst í gær.

Takk fyrir lesninguna.

Velkominn í bloggheiminn

Jæja, þá hef ég ákveðið að fara að skrifa hér, ég hef mikið að segja og vonandi kem ég því frá mér á skiljanlegan hátt.  Þetta er fyrsta bloggfærslan mín og ætla ég að hafa hana stutta því að fall er fararheill.

Fyrsta bloggfærsla

Þessi færsla er búin til af kerfinu þegar notandi er stofnaður. Henni má eyða eða breyta að vild.